Brussell, il-21 ta’ Settembru — Il-Bord Ewropew għall-Protezzjoni tad-Data (EDPB) u l-Kontrollur Ewropew għall-Protezzjoni tad-Data (EDPS) adottaw Opinjoni Konġunta dwar il-Proposta tal-Kummissjoni Ewropea għal Regolament dwar regoli proċedurali addizzjonali għall-infurzar tal-GDPR. Din il-proposta għandha l-għan li tiżgura t-tlestija f’waqtha tal-investigazzjonijiet u t-twassil ta’ rimedji rapidi għall-individwi f’każijiet transfruntiera, billi tarmonizza għadd ta’ differenzi proċedurali madwar l-UE u tissimplifika l-proċedura ta’ kooperazzjoni transfruntiera. Il-proposta ssegwi lista ta’ xewqat mibgħuta mill-EDPB lill-Kummissjoni Ewropea f’Ottubru 2022.
Il-President tal-EDPB, Anu Talus qalet: “Aħna nilqgħu r-rispons rapidu tal-Kummissjoni għas-sejħa tagħna għal azzjoni u ninsabu kuntenti li l-lista tax-xewqat tagħna issa ġiet ittrasformata fi proposta leġiżlattiva konkreta, li ser tikkomplementa l-GDPR. B’din l-Opinjoni Konġunta, għandna l-għan li niżguraw li r-Regolament il-ġdid jaħdem għall-partijiet kollha involuti. Minħabba l-importanza kbira tiegħu, inħeġġu lill-koleġiżlaturi biex jadottaw malajr dan ir-Regolament il-ġdid.”
Il-Kontrollur tal-EDPS, Wojciech Wiewiórowski qal: “Il-proposta tal-Kummissjoni hija tentattiv pożittiv biex jiġu indirizzati wħud mill-isfidi identifikati mill-esperti u l-prattikanti relatati mal-governanza tal-mekkaniżmu ta’ Punt Uniku ta’ Servizz. Bl-Opinjoni Konġunta tagħna, nittamaw li nkomplu ntejbu l-leġiżlazzjoni futura u, b’mod partikolari, li nrawmu riżoluzzjoni f’waqtha ta’ każijiet transfruntiera, u li niżguraw li d-drittijiet proċedurali tal-ilmentaturi jiġu rispettati, filwaqt li jitqiesu r-restrizzjonijiet inerenti fil-mudell ta’ infurzar tal-GDPR. Barra minn hekk, nappellaw lill-koleġiżlaturi biex jużaw din l-opportunità biex jindirizzaw l-ostakli prattiċi għal kooperazzjoni effiċjenti bejn l-awtoritajiet nazzjonali tal-protezzjoni tad-data u l-EDPS.”
L-EDPB u l-EDPS jilqgħu l-isforzi tal-Kummissjoni biex tarmonizza l-informazzjoni li għandha tiġi pprovduta biex ilment jitqies ammissibbli u jitolbu wkoll armonizzazzjoni eżawrjenti tar-rekwiżiti ta’ ammissibbiltà. Huma jinnotaw ukoll b’mod pożittiv il-kjarifiki dwar id-dritt ta’ aċċess għall-fajl amministrattiv. Barra minn hekk, il-proposta tal-Kummissjoni biex tingħata spinta lis-sejba ta’ kunsens kmieni fil-proċedura ta’ kooperazzjoni, hija essenzjali għal kooperazzjoni fl-infurzar aktar effiċjenti u msaħħa.
Fost diversi rakkomandazzjonijiet oħra, l-EDPB u l-EDPS iqisu li l-proposti għal sejbien ta’ kunsens jistgħu jittejbu aktar billi jiġi żgurat li l-awtoritajiet superviżorji kkonċernati (CSAs) ikunu aktar involuti fil-passi differenti tal-proċedura, peress li dan jevita tilwim possibbli fi stadju aktar tard. B’mod partikolari, is-“sejbiet preliminari” indirizzati lill-partijiet taħt investigazzjoni u l-“fehma preliminari” biex jiġi miċħud l-ilment jenħtieġ li jiġu kondiviżi mas-CSAs qabel ma jiġu ppreżentati lill-partijiet taħt investigazzjoni jew lill-ilmentatur. Barra minn hekk, il-limiti ta’ żmien, li jistgħu jiġu estiżi f’ċirkostanzi debitament ġustifikati, jenħtieġ li jiġu definiti għal ċerti passi proċedurali biex jippermettu infurzar rapidu u effiċjenti.
L-EDPB u l-EDPS jenfasizzaw li l-Proposta ma għandhiex tillimita bla bżonn il-kapaċità tas-CSAs li jqajmu oġġezzjonijiet rilevanti u motivati dwar abbozz ta’ deċiżjoni, inkluż dwar il-kamp ta’ applikazzjoni tal-investigazzjoni. Huma jħeġġu wkoll lill-koleġiżlaturi biex ma jbiddlux l-approċċ attwali għad-dritt tal-partijiet li jinstemgħu fil-proċedura għas-soluzzjoni tat-tilwim, li tiġi attivata meta l-awtoritajiet tal-protezzjoni tad-data (DPAs) jonqsu milli jilħqu kunsens dwar każ. Il-bidla proposta tkun teħtieġ li l-President tal-EDPB jipprovdi lill-partijiet taħt investigazzjoni u lill-ilmentatur b’“dikjarazzjoni tar-raġunijiet”. Dan jidher li mhuwiex konformi mal-arkitettura tas-sistema tal-Punt Uniku ta’ Servizz; Huwa wkoll inutli fid-dawl tal-prattika attwali li tippermetti lill-EDPB iqis kif xieraq il-fehmiet tal-partijiet u jilħaq deċiżjoni sal-iskadenzi.
Fir-rigward tal-proċedura ta’ urġenza skont l-Artikolu 66(2) tal-GDPR, l-EDPB u l-EDPS iħeġġu lill-koleġiżlaturi jispeċifikaw li l-miżuri finali jiġu adottati mid-DPAs kompetenti u, kif xieraq, b’kamp ta’ applikazzjoni usa’ mit-territorju tad-DPA rikjedenti.
Fl-aħħar nett, kif enfasizzat mill-EDPS fil-kontribut tiegħu dwar l-inizjattiva tal-Kummissjoni, mibgħuta f’April 2023 lill-Kummissjoni, l-ostakli prattiċi eżistenti għall-kooperazzjoni effiċjenti bejn id-DPAs nazzjonali u l-EDPS għandhom jiġu indirizzati. L-EDPB u l-EDPS għalhekk jirrakkomandaw l-introduzzjoni ta’ dispożizzjoni speċifika għal dan l-għan.
L-EDPB u l-EDPS adottaw ukoll kontribuzzjoni konġunta bi tweġiba għall-konsultazzjoni pubblika tal-Kummissjoni Ewropea dwar il-mudell tar-rapport għad-deskrizzjoni tat-tekniki tat-tfassil ta’ profili tal-konsumatur skont l-Artikolu 15 tal-Att dwar is-Swieq Diġitali (DMA). Skont l-Att dwar is-Swieq Diġitali, il-gwardjani ddeżinjati se jkollhom jissottomettu dawn ir-rapporti kull sena lill-Kummissjoni Ewropea. L-abbozz tal-mudell għandu l-għan li jispeċifika x’għandhom jinkludu l-gwardjani fid-deskrizzjonijiet awditjati b’mod indipendenti tat-tekniki tat-tfassil tal-profili tagħhom. Dawn id-deskrizzjonijiet se jiġu trażmessi mill-Kummissjoni lill-EDPB u se jinfurmaw l-azzjonijiet ta’ infurzar mid-DPAs.
L-EDPB u l-EDPS jifformulaw diversi rakkomandazzjonijiet biex jiċċaraw il-kamp ta’ applikazzjoni tal-informazzjoni mfittxija mill-Kummissjoni li se tiġi trażmessa lill-EDPB. Huma jirrakkomandaw li l-gwardjani jipprovdu informazzjoni addizzjonali dwar il-kategoriji ta’ data personali pproċessata u s-sorsi tagħhom, iċ-ċiklu tal-ħajja tal-ipproċessar inkwistjoni, il-bażi ġuridika invokata, il-miżuri meħuda fir-rigward tad-drittijiet tas-suġġetti tad-data u deskrizzjoni tas-salvagwardji tekniċi xierqa implimentati mill-gwardjani.
The news published here does not constitute official EDPB communication, nor an EDPB endorsement. This news item was originally published by the national supervisory authority and was published here at the request of the SA for information purposes. Any questions regarding this news item should be directed to the supervisory authority concerned.